Taasisi binafsi zatakiwa kuonesha ushirikiano katika uwekaji wa Anwani za Makazi Manispaa ya Singida.

Posted on: May 10th, 2022

Taasisi zisizo za Serikali ambazo zipo ndani ya Manispaa ya Singida zimetakiwa kutoa maelezo  juu ya kutokuwepo kwa  vibao vya Anwani za Makazi na postikodi katika  maeneo hayo  wakati yalikuwa ndio makubaliano kwa taasisi zote kufanya hivyo.

Maelekezo hayo yametolewa leo na Mkuu wa Mkoa wa Singida Dkt. Binilithy Mahenge alipofanya ziara ya kukagua uwekaji wa Anwani za Makazi na postikodi katika Kata za Majengo na Mwankoko Manispaa ya Singida Mkoani hapa baada ya kupata taarifa kutoka kwa Mtendaji Kata hiyo kwamba taasisi zilizobaki ni zile binafsi zikihusisha Misikiti na Makanisa.

"Mkurugenzi waiteni wote wenye taasisi binafsi waeleze kwa nini wanachelewesha zoezi la Anwani za Makazi kwa kutoweka vibao vinavyotambusha maeneo yao?,  nataka ifikapo alhamisi tarehe 12 Mei 2022 nipate taarifa ya uwekaji wa vibao katika Taasisi hizo" Alisema Rc Mahenge.

Mkuu wa Mkoa wa Singida Dkt. Binilithy Mahenge akisisitiza jambo wakati wa ziara hiyo

Aidha pamoja na changamoto hizo RC Mahenge ameipongeza Manispaa hiyo kwa kutekeleza kwa usahihi zoezi la uwekaji wa namba za nyumba na vibao elekezi vya Barabarani hivyo kuwataka kuhakikisha wanamalizia sehemu chache zilizobaki kabla ya Siku ya tathmini ambayo ni tarehe 12 Mei 2022 alibainisha RC Mahenge.

Naye Kaimu Mkurugenzi wa Manispaa ya Singida Jeshi Lupembe ameahidi kutekeleza maagaizo yote yaliyotolewa na Mkuu wa Mkoa ikiwemo kurekebisha baadhi ya vibao elekezi na kuwaita wenye taasisi binafsi kujua kwanini hawajaweka vibao vya Makazi na wanaviweka Siku gani.

Jeshi ameongeza kwamba endapo kutatokea ugumu wowote katika kufanikisha zoezi hilo Halmashauri italazimika kuweka vibao vyenye ubora hafifu ili kuondoa dosari katika zoezi hilo ambapo watalazimika kubadilisha wenyewe baadae.

Ziara hiyo iliwashirikisha viongozi mbalimbali wa Mkoa, Wilaya na Halmashauri ya Manispaa ya Singida na inategemewa kufanyika tena Siku ya tareh 12 Mei 2022 asubuhi katika Wilaya ya Singida Vijijini kabla ya tathmini.

Mkuu wa Mkoa wa Singida Dkt. Binilithy Mahenge akielekeza jambo wakati wa ziara hiyo

Mshauri wa Jeshi la Akiba Mkoa wa Singida Kanali RG. Magemeson akizungumza jambo wakati wa ziara hiyo. Kushoto ni Mstahiki Meya wa Manispaa ya Singida, Mhe. Yagi Kiaratu

Ziara ikiendelea