TEKNOLOJIA KUTUMIKA KUFUNDISHIA WANAFUNZI MKOANI SINGIDA

Posted on: January 9th, 2025

Mkoa wa Singida umeweka mkakati wa kutumia teknolojia ya kufundisha masoko ya sayansi na Hisabati kwa kuziunganisha shule zote kwenye mtandao wa kompyuta ili Waalimu wachache waliopo wa masomo hayo waweze kufundisha shule nyingi.

Hayo yamesemwa na Mkuu wa Mkoa wa Singida,Mhe.Halima Dendego  leo  wakati akihojiwa na kujibu maswali ya wananchi katika kituo cha redio cha Standard Radio ya mjini Singida katika kipindi cha "ZINDUKA" kuhusu mambo mbalimbali yaliyoyofanywa na serikali kwa mwaka uliopita na mikakati iliyopo kwa mwaka huu.

Amesema mkakati huo wa kutumia teknolojia kufundisha kwa masomo ya Sayansi na Hisabati ifikapo Juni mwaka huu 2025 shule zote hususani za Sekondari zitakuwa zimeunganishwa kwenye mtandao wa Kompyuta  na kwamba wamekuja na teknolojia hiyo kwa lengo la kukabiliana na upungufu wa walimu.

"Tumekuwa na  upungufu wa walimu katika mkoa wetu hususani wa masomo ya Sayansi lakini Serikali kupitia Vyuo vya Ualimu imeendelea  kuzalisha walimu na Singida tumekuwa tukipata mgao wa walimu na tutahakikisha hakuna mtoto anayekosa somo fulani sababu ya upungufu wa walimu,"alisema Mhe.Dendego

Hata hivyo,Mhe.Dendego amesema ataitisha kikao na Waalimu kuzungumza nao kwani pamoja na upungufu uliopo maeneo ya mijini kuna idadi kubwa ya Waalimu huku  vijijini wakiwa wachache jambo ambalo litakwenda kupatiwa ufumbuzi ili kuweka uwiano sawa wa Waalimu katika shule zote kuanzia katika ngazi ya Kata na Vijijini.

Akizungumzia Kuhusu ukusanyaji wa mapato,alisema Halmashauri zinajitahidi sana kukusanya mapato ambapo katika robo ya kwanza zimekusanya asilimia 52 ambayo ni zaidi ya malengo  ya kukusanya ya  asilimia 50 na kuziagiza Halmashauri kuendelea kuongeza nguvu katika ukusanyaji hususani Halmashauri za Wilaya ya Iramba,Mkalama na Manispaa ya Singida.

Aidha,Mkuu wa Mkoa amewataka Wafanyabiashara kutoa stakabadhi za malipo kwa wateja wanaponunua bidhaa katika maduka yao ili kushirikiana na serikali katika mnyororo wa kukusanya mapato.

"Tunamshukuru Rais Dk.Samia Suluhu Hassan kwa kuendelea kutoa fedha kwa ajili ya miradi mbalimbali kwenye Mkoa wa Singida na sisi kama watendaji tutaendelea kusimamia kuhakikisha fedha zinatumika kwa malengo yaliyokusudiwa," alisema.

Akizungumza kwa njia ya simu katika kipindi hicho,msikilizaji aliyejitambulisha kwa jina la Mashaka Paul ametoa pongezi kwa Mkuu wa Mkoa wa Singida kwa kuandaa mazingira mazuri ya kuwafikia wananchi katika kusikiliza na kutatua kero zao na kuahidi kushirikiana na uongozi wa Mkoa wa Singida katika mapambano ya kuhakikisha maendeleo yanapatikana kwa faida ya mtu mmoja mmoja na Mkoa kwa ujumla.