VETA Watakiwa Kuhamasisha vijana wa Sekondari kujifunza ufundi.

Posted on: February 28th, 2023

Mamlaka ya Elimu na Mafunzo ya Ufundi Stadi (VETA ) wameshauriwa kuimarisha mifumo kuanzia chini kueleza umuhimu wa ufundi na faida zake ili kuwavutia vijana wengi kujiunga katika vyuo hivyo.

Ushauri huo umetolewa leo na Katibu Mkuu CCM Taifa Daniel Chongolo, alipotembelea ujenzi wa majengo ya Chuo cha VETA Ikungi na kusihi kutengeneza programu ya kueleza umuhimu wa ufundi na faida zake ili kuongeza kipato na kuimarisha dhana ya ujasiriamali.

Amesema kwa sasa Taifa lina vyuo vichache vya Serikali ambavyo vinatoa elimu ya kati hivyo kusababisha watumishi kwenye mashirika mbalimbali kushindwa kusimamia upatikanaji wa uzoefu kazini.

Chongolo alisema tunaweza kuwa na vyuo vingi vya VETA lakini usipowekwa mfumo mzuri wa kuwafanya vijana waone umuhimu wa kujiunga na vyuo hivyo tutajikuta tunabaki na majengo tu ambayo hayawanufaishi wananchi.

"Anzeni kutengeneza programu ya kwenda chini kwenye shule za Sekondari ili kabla vijana hawajamaliza kueleza umuhimu wa ufundi, faida zake na namna unavyoweza kuzifikia faida hizo," alisema.

Alisema Serikali katika miaka hiyo mitatu imekuwa ikitoa fursa ya mafunzo ya ufundi bure lakini jambo la msingi ni VETA kupata vijana wa kutosha wanaojiunga na vyuo hivyo.

Naye Mkurugenzi wa VETA Kanda ya Kati, John Mwanja, alisema ujenzi wa chuo cha VETA Ikungi ulianza katika bajeti ya 2019/2020 ambapo hadi sasa Sh. Bilioni 2.3 zimeshatumika katika ujenzi huo ambao utakamilika Aprili mwaka huu.

Mwanja alisema ili chuo hicho kiweze kuanza kazi kwa ajili ya kukamilisha ujenzi, Serikali imetoa Sh. Milioni 259 na kwamba kitakapoanza kitaanza kutoa mafunzo ya kozi ndefu kwa wanafunzi 240 na wa kozi fupi kati wanafunzi 250 hadi 900 kwa mwaka.

Mwisho