Watoto wenye umri wa miaka chini ya 15 Ikungi wanavyoshiriki vitendo vya wizi

Posted on: January 19th, 2023

Vyombo vya Ulinzi na Usalama Wilayani Ikungi Mkoani Singida vimeagizwa kufanya msako wa kina na kuwabaini watoto wenye umri wa miaka hadi kumi na tano wanaotajwa kushiriki vitendo vya wizi na ukabaji wakati wa usiku pamoja na wezi wengine na kuwafungulia mashtaka ili kuondoa vitendo hivyo ambavyo inasemekana vimekithiri katika eneo la Kijiji cha Puma Wilayani hapo.

Maelekezo hayo yametolewa leo na Mkuu wa Mkoa huo Peter Serukamba wakati akisikiliza na kutatua kero za Wananchi wa Wilaya ya Ikungi Mkoani hapo Mkutano ambao uliofanyika katika viwanja vya wazi katika Kijiji cha Puma.

Amesema vyombo vya Ulinzi na Usalama vishirikiane kupeleleza na kufanya msako mkali kuhakikisha watoto hao wanakamatwa na wanafunguliwa mashtaka ili kukomesha tabia hiyo huku akiwakumbusha wazazi kushirikiana na vyombo hivyo kuwapata.

Aidha, RC amekemea vikali tabia ya baadhi ya watu wanaoshiriki kuiba miundombinu ya barabara na umeme ambayo imesemekana inatumika kutengenezea mikokoteni na majembe ya kukokotwa na wanyama.

Kwa upande wake Mwenyekiti wa Kijiji hicho Samweli Mdimu ameelezea kero hiyo kwamba walifanya msako na kukamata baadhi ya watoto hao ambapo wazazi wao walikiri kwamba hawana pa kuwapeleka.

Samweli aliendelea kumueleza RC Serukamba kwamba walipowakamata na kuwafikisha Kituo cha Polisi Maafisa wa Polisi walishauri waachiwe kwa kuwa walikuwa na umri mdogo hivyo wazazi wao waelezwe ili wawaonye.

Aidha wananchi hao wameomba Polisi kuongeza ushirikiano na wananchi ikiwezekana  kushirikiana na Mgambo  wakati wa kufanya doria huku wakiomba Kituo chao cha Polisi kufanya kazi masaa 24 ili kiweze kuwasaidia nyakati zote.

Mwisho