Dkt. Mahenge Atangaza Fursa kwa Wawekezaji Mkoani Singida

Posted on: May 14th, 2022

Wawekezaji wa aina mbalimbali wameaswa kuendelea kuwekeza Mkoani Singida kwa kuwa kuna fursa nyingi za uwekezaji na ni katikati ya nchi jambo ambalo linarahisisha usafirishaji wa bidhaa kutoka sehemu moja kwenda nyingine.

Miundombinu ya Barabara  mazingira mazuri ya ki biashara yameendelea kuboreshwa Mkoani hapo ili kuvutia uwekezaji na biashara kwa ujumla.

Kauli hiyo imetolewa hivi karibuni na Mkuu wa Mkoa huo Dkt. Binilith Mahenge wakati akizindua ufunguzi wa duka jipya la vifaa vya Ujenzi lililopo Singida mjini  lijulikanalo kama NAJEL BUILDERS COMPANY LIMITED.

Mkuu wa Mkoa wa Singida Dkt. Binilith Mahenge akikata utepe kuashiria uzinduzi rasmi wa duka la vifaa vya ujenzi la Kampuni ya Najel Builders LTD mkoani Singida

Dkt. Mahenge ameipongeza Kampuni hiyo kwa kuwaletea wana Singida huduma hiyo nakubainisha kwamba usambazaji wa bidhaa hizo za Ujenzi zitanufaisha mikoa yote ya pembezoni. 

Aidha ameitaka Kampuni hiyo kuuza vitu vyenye ubora wa Hali ya juu ili kuwanufaisha wananchi wa Singida lakini pia kuimarisha soko katika maeneo yote ya ndani na nje ya Mkoa.

Hata hivyo amewataka wawekezaji kuendelea kuwekeza kwa kuwa Serikali inaendelea kuboresha Mazingira ya Biashara ikiwemo kutenga maeneo mahsusi kwa wamachinga nakuimarisha ulinzi na usalama wa watu na mali zao.

Naye Mstahiki Meya wa Manispaa ya Singida Mhe. Yagi Kiaratu amesema uwekezaji kama huo unafaida kwa Serikali na Manispaa kwa kuwa wanachangia kodi ya mapato ambayo itaharakisha maendeleo kwa wananchi.

Kwa upande wake Mkurugenzi wa Kampuni ya NAJEL BUILDERS Ltd Mhandisi Neema Nzwalile amemshukuru Mkuu wa Mkoa wa Singida Dkt Binilith Mahenge kwa kukubali wito huo sambamba na mapokezi mazuri ya Serikali ya Mkoa huo katika sekta ya uwekezaji hali iliyoongeza chachu na hamasa kwa wawekezaji wazawa.

Hafla hiyo ilihudhuriwa na viongozi mbali mbali wakiwemo waheshimiwa Madiwani wa Singida Mjini, Wahandisi wa Ujenzi kutoka sekta binafsi, mafundi Ujenzi pamoja na wafanyabiashara wa mkoani Singida.

MATUKIO MBALIMBALI KATIKA PICHA

Mkuu wa Mkoa wa Singida Dkt. Binilith Mahenge akizungumza na wadau na washiriki mbalimbali katika sekta ya ujenzi, Wahandisi, Wafanyabiashara (hawapo pichani) waliojitokeza kushuhudia uzinduzi wa duka la vifaa vya ujenzi mkoani Singida 

Mkurugenzi wa Kampuni ya Najel Builders L.T.D inayajihusisha na ujenzi na usimamizi wa miradi, usambazaji wa vifaa vya ujenzi Mhandisi Neema Nzwalile akimuonesha Mhe. Mkuu wa Mkoa wa Singida Dkt. Binilith Mahenge baadhi ya bidhaa za ujenzi zinazopatikana katika duka hilo mara baada ya uzinduzi Mei 13, 2022

Mstahiki Meya wa Manispaa ya Singida Mhe. Yagi Kiaratu akizungumza wakati wa hafla ya uzinduzi huo.

Mkuu wa Mkoa wa Singida Dkt. Binilith Mahenge (wa pili kutoka kushoto) akiwa katika picha ya pamoja na Waheshimiwa Madiwani wa Singida Mjini, Mkurugenzi wa Kampuni na baadhi ya wageni waalikwa walioshiriki katika uzinduzi huo.