Watumishi wa Sekretarieti ya Mkoa wa Singida wafundwa kuweka akiba.

Posted on: February 23rd, 2022

Watumishi wa Sekretarieti ya Mkoa wa Singida leo wamejengewa uwezo wa uwekaji wa akiba fedha zao  kupitia kampuni ya UTT AMIS inayohudumia mifuko mbalimbali ikiwemo mfuko wa umoja, wekeza maisha, mfuko wa watoto na mfuko wa kujikimu.

Akieleza umuhimu wa kuwekeza katika mifuko iliyoanzishwa na ATT AMIS muendesha mada Bi Grace Ngairo kutoka Taasisi ya UTT AMIS iliyo chini ya Wizara ya fedha amewahamasisha watumishi kujiunga na mifuko hiyo kwa kuwa kampuni hiyo inaendeshwa na wataalamu waliobobea  katika masuala ya uwekezaji.

Aidha Grace amesema mifuko hiyo ni rahisi kufuatitia mienendo ya masoko kwa mteja na wawekezaji wanafaidika pamoja na unafauu wa gharama za uwekezaji.

Akiendelea na wasilisho lake kwa watumishi hao Grace akabainisha kwamba kupitia mfuko wa taasisi hiyo mwekezaji anapunguza hatari za uwekezaji kwa kuwekeza katika uwekezaji anuai ambapo alibainisha kwamba mfumo huo ni rahisi kujiunga.

Aidha amewashauri watumishi hao kupunguza matumizi yasiyokuwa ya lazima huku akiwafundisha kutenga asilimia 10 hadi 20% kwa fedha yeyote wanayoipata ili kuongeza uwekezaji kwa maisha ya baadae.

Naye Kaimu Afisa Tawala wa Mkoa huo Bwana Justo Hermani akitoa shukrani kwa watoa mada hao amewataka watumishi kujitafakari kwa mafunzo waliyoyapata na kuaanza kuwekeza kwa ajili ya maisha yao ya baadae na watoto wao.

Bwana Justo akabainisha kwamba uwekezaji huo utawasaidia watumishi ambao wengi wao wamewekeza kwenye ujenzi wa majumba na ununuzi wa magari ambao amesema mali hizo huchukua muda mrefu kuuzika pindi mtumishi anapopata dharura kuliko fedha uliyowekeza.

Kwa upande wake Bwana Peter Kashindye moja ya watumishi waliohudhuria mafunzo hayo  ameshukuru ujio wa wataalamu hao ambao ameeleza kwamba uwekezaji uliofundisha  utasaidia katika kujipanga  kusomesha watoto kwa urahisi na kujiandalia maisha ya baadae.