ONGEZEKO LA TALAKA NA WATOTO WA MITAANI KUTAFUTIWA MWAROBAINI WAKE SINGIDA

Posted on: January 22nd, 2025

Viongozi wa BAKWATA Mkoani Singida wameazimia kutoa elimu kuhusu maisha ya ndoa kwa wakazi wa Singida lengo likiwa ni kupungua mmomonyoko wa maadili katika jamii pamoja na kuondoa ongezeko la Talaka na Watoto wa mitaani.

Hayo yamezungumzwa leo na Viongozi wa BAKWATA Mkoa wa Singida walipotembelea Ofisi ya Mkuu wa Mkoa wa Singida Mheshimiwa Halima Dendego na kuzungumza kuhusu azma yao ya kutoa elimu hiyo kwa wananchi.

Akizungumzia suala hilo,Sheikh wa Mkoa wa Singida Issa Nassoro, amesema ni wakati sahihi kuhakikisha elimu inatolewa kwa jamii ili kuondoa tabia mpya zisizofaa na kuonekana za kawaida katika jamii yetu kwa kuzikomesha ili kukwepa madhara yake mengi ikiwemo kutalikiana kwa wazazi jambo linalopunguza upendo na amani kwa watoto wao huku wengi wakikosa mahitaji muhimu kama elimu na uangalizi wa karibu yaani malezi bora.

Naye Mkuu wa Mkoa wa Singida Mhe.Dendego ameahidi kutoa ushirikianao wa kutosha kwa viongozi hao wa dini kwa kuhakikisha elimu inatolewa na inawafikia wanajamii wote huku akiimba viongozi na wazazi kushirikiana kwa ukaribu ili kuhakikisha vijana wanarudi katika mienendo bora na kuishi katika imani kwa lengo la kuwa mfano wa kuigwa sio kwa wenzao pekee bali jamii na Taifa kwa ujumla.

Pia amewaasa wanajamii kuepuka kutengeneza makundi ya chuki baina ya wazazi kwasababu ya talaka kwani huleta madhara mengi mabaya kwa wote wanaowazunguka hususani watoto ambao bila malezi bora huishia katika mienendo isiyofaa.

"Familia ndio jamii, Ukishakuwa na familia bora utazalisha jamii bora"Amesema Mhe.Dendego.

Katika miaka ya hivi karibuni kumekua na ongezeko la ndoa nyingi kuvunjika kwa sababu mbalimbali huku ikidaiwa kuchochewa na mporomoko mkubwa  wa maadili inayochangiwa na malezi yasiyofaa na matumizi mabaya ya Teknolojia.Kwa kutoa elimu ya maadili katika jamii pamoja na maadili katika ndoa kutapunguza pasi na kuondoa kabisa utoaji wa talaka ambao utakuwa moja ya sababu kubwa ya kukuza maendeleo ya jamii na Taifa kwa ujumla kutokana na utulivu utakaokuwepo utakaotoa muda mrefu wa uzalishaji mali.

@USIKOSE KUFUATILIA MITANDAO YETU YA KIJAMII

INSTAGRAM:SINGIDA RS

FACEBOOK:SINGIDA RS

YOUTUBE:RAS SINGIDA