Washauriwa kuongeza usimamizi wa vyanzo vya mapato _ RC Mahenge

Posted on: June 15th, 2022

Washauriwa kuongeza usimamizi wa vyanzo vya mapato _ RC Mahenge

Manispaa ya Singida imetakiwa kuongeza usimamizi na kubaini vyanzo vipya vya mapato vitakavyo saidia kuendesha miradi mbalimbali ambayo inachelewa kukamilika kutokana na Uhaba wa fedha.

Hayo yamesemwa na Mkuu wa Mkoa wa Singida  Dk.Binilith Mahenge alipokuwa akihutubia Baraza la Madiwani la Manispaa hiyo lililokutana leo kujadili hoja za ukaguzi Mkutano ambao ulifanyika katika ukumbi wa   Shule ya Sekondari  Mwenge Mjini hapo .

RC Mahenge amesema kwamba Halmashauri hiyo ina vyanzo vingi vya mapato ambavyo havijasimamiwa vizuri na endapo usimamizi utakuwa mzuri mapato yangeongezeka kwa kiasi kikubwa.

"Fanyeni tathmini ya vyanzo vyenu vya mapato mjiridhishe muone  uwezo wake na kiwango mnachopata vinaendana? Nina amini vyanzo vya mapato Kama vituo vya Afya na standi vina uwezo wa kutoa mapato makubwa havijasimamiwa ipasavyo" Alisema RC Mahenge.

Aidha amewataka kutumia mamlaka na vyombo walivyonavyo kukusanya mapato ili kukabiliana na wateja  ambao wanakwepa kulipa kodi ya Serikali.

Hata hivyo ameipongeza Halmashauri hiyo kwa kuwa na hoja chache za ukaguzi ambazo zinatokana na sera na bàadhi yake kutokana na mikopo ya vikundi.

Hata hivyo RC ametoa angalizo kwa Madiwani pamoja na wataalamu wa maendeleo ya Jamii kuhakikisha  wanafanya tathmini ya mkopaji kabla ya kumkopesha ikiwa ni pamoja na elimu ya ujasiriamali na namna  ya kutunza fedha.

 Awali akimkaribisha Mkuu huyo Mstahiki Meya Yagi Kyaratu amesema wapo tayari kutekeleza maagizo hayo huku akieleza kwamba tayari wameshaanza kubaini vyanzo vingine vya mapato ikiwemo Ujenzi wa maegesho ya magari kutokana na uwekezaji utakao anza hivi karibuni wa Mradi wa Umeme wa upepo .

 Amesema wametenga bajeti kwa ajili ya kutengeneza Mazingira mazuri ya fukwe za ziwa Kindai na Singidani Kama sehemu ya mapumziko ambayo yatatumika pia kuingizia mapato Halmashauri kwa namna tofauti.

Mwisho