WAKAGUZI WAFANYA ZIARA MKOANI SINGIDA KUKAGUA MASUALA YA KIUTENDAJI.

Posted on: September 17th, 2025

Singida, Tanzania – Septemba 17, 2025

Wakaguzi kutoka Ofisi ya Rais – Tume ya Utumishi wa Umma, kwa kushirikiana na Wakuu wa Idara na Vitengo kutoka Ofisi ya Mkuu wa Mkoa wa Singida, wameanza kikao kazi cha siku nne chenye lengo la kufanya ukaguzi wa masuala mbalimbali yanayohusu ustawi na utendaji wa watumishi wa umma katika mkoa huo.

       Ukaguzi huo unalenga kuangazia maeneo muhimu ikiwa ni pamoja na usalama wa watumishi mahali pa kazi, mazingira ya kazi, pamoja na ufuataji wa sheria, taratibu na maagizo ya kiutumishi, kama vile upandishaji vyeo, utoaji wa likizo, na masuala mengine yanayohusu haki na wajibu wa watumishi wa umma.

Mbali na ukaguzi wa kiutendaji, wakaguzi hao pia watapokea maoni na kusikiliza changamoto mbalimbali kutoka kwa watumishi wa umma katika taasisi mbalimbali ndani ya Mkoa wa Singida. Zoezi hilo linafanyika kwa lengo la kubaini maeneo yenye changamoto na kutoa mapendekezo ya maboresho ili kuhakikisha uwajibikaji na utendaji bora katika utumishi wa umma.

       Akizungumza wakati wa kuwapokea wakaguzi hao, Kaimu Katibu Tawala wa Mkoa wa Singida, Bw. Boaz Kajigili, alisema kuwa Ofisi ya Sekretarieti ya Mkoa itatoa ushirikiano wa kutosha kwa wakaguzi hao ili waweze kukamilisha kazi yao kwa weledi na kwa wakati.

"Ni imani yetu kuwa kupitia ukaguzi huu, tutaimarisha mifumo ya kiutumishi na kuhakikisha kuwa watumishi wa umma wanatekeleza majukumu yao kwa amani, utulivu, na kwa kufuata misingi ya sheria na kanuni," alisema Bw. Kajigili.

Ukaguzi huu una faida nyingi kwa taasisi za umma na watumishi wenyewe. Kwanza, unasaidia kubaini changamoto za kiutumishi zinazokwamisha utendaji bora, hivyo kuwezesha hatua stahiki kuchukuliwa. Pili, ukaguzi huongeza uwazi na uwajibikaji kwa watumishi wa umma, kwani unalenga kuhakikisha kuwa taratibu zote za kiutumishi, kama vile upandishaji vyeo na utoaji wa likizo, zinafanyika kwa haki na kwa mujibu wa sheria.

 Tatu, zoezi hili linatoa fursa kwa watumishi kueleza matatizo yao moja kwa moja kwa mamlaka husika, hivyo kusaidia kutatua migogoro ya kikazi mapema kabla haijazaa athari kubwa. Hatimaye, ukaguzi kama huu huimarisha nidhamu na ufanisi katika utumishi wa umma, jambo linalochochea maendeleo ya kiutawala na kijamii katika ngazi ya mkoa na taifa kwa ujumla.