Wazazi watakiwa kuwa waangalifu kwa watoto katika kipindi hiki cha mvua

Posted on: February 15th, 2022

Wazazi na walezi Mkoani Singida wametakiwa kuchukua tahadhari katika kipindi hiki cha mvua dhidi ya uwepo wa madimbwi, mifereji kujaa maji pamoja na vyoo vya mashimo kwa kuwa imeonekana kuwa hatari kwa watoto.

Wito huo umetolewa na Mkuu wa Mkoa wa Singida Dk. Binilithy Mahenge leo Februari 15, 2022 alipofanya ziara katika shule ya msingi Mndimu iliyoko wilayani Ikungi Mkoani hapa.

Mkuu wa Mkoa wa SIngida Dk. Binilithy Mahenge akiongea wakati alipofanya ziara katika shule hiyo.

Amesema katika kipindi hiki cha mvua kila mzazi au mlezi anapaswa kuangalia miundombinu yote ya barabara na majumbani mwao kama sehemu ya kuchukua tahadhari na kuepuka maafa yanayoweza kutokea kutokana na uwepo wa mvua nyingi.

Hata hivyo amebainisha kwamba katika kipindi hiki cha mvua kuna uwezekano mkubwa wa majengo na miundombinu mbalimbali kupata nyufa ambazo zinaweza kusababisha majanga hivyo ni jukumu la kila mmoja kuchukua tahadhari.

RC Mahenge akawaagiza Wahandisi mkoani hapo kutembelea na kukagua maeneo yote na kufanya tathmini itakayoonesha uharibifu wa miundombinu ya shule madaraja na barabara kama sehemu ya kuepusha majanga katika jamii inayowazunguka.

Kwa upande wake Mkurugenzi mtendaji Halmashauri ya wilaya Ikungi Justice Kijazi akatumia muda huo kumueleza Mkuu wa mkoa kwamba kutokana na uwepo wa mvua nyingi ipo miundo mbinu ya baadhi ya shule ikiwemo shule ya msingi Mandimu ambayo imeathiriwa na mvua zinazoenedelea kunyesha.

Kijazi akaendelea kufafanua kwamba tayari Serikiali imetoa jumla ya Tsh. Milioni 40 na wakati huo Mbunge wa jimbo la Ikungi Mashariki akatoa ahadi ya Tsh.  milioni moja kwa ajili ya ujenzi wa vyumba viwili vya madarasa katika shule hiyo ambapo RC Mahenge naye akaahidi kutoa kiasi cha Tsh. Milioni moja kwa ajili ya ujenzi huo.

Wakati huo huo RC. Mahenge ametoa pole kwa familia ya watu sita (6) wa Kata ya Ihanja wilayani humo ambao wamelazwa katika kituo cha afya cha Ihanja baada ya kula uyoga ambao umeonekana kuwa na sumu na kuathiri afya zao.

Amesema familia hiyo inahusisha watoto wane (4) na wazazi wawili (2) ambao hivi karibuni walikula uyoga huo kwa kuchanganya na mboga za majani kama sehemu ya kitoweo pasipo kujua kama ungekuwa na sumu.

Aidha RC Mahenge amewataka wataalum wa afya na maafisa kilimo kutoa elimu kuhusu aina za uyoga na matumizi yake ili kuondoa changamoto za kiafya.